يا أغلى عندي من حياتي ...
يا أغلى عندي من حياتي
يا اللي حبك ماضي آتي
بعشقك والعشق طارح
افردي قلوعك مطارح
واسكني ف حضني اللي بارح
جوا حضنك بلقى ذاتي
يا أغلى عندي من حياتي
*****************************
لقانا كان مكتوب لنا
والحب جمّع شملنا
كنتي غايبة عني فين
عدى من عمري سنين
شفتك ودبت ف نظرتين
نسّوني حتى مين أنا
واتغيرت بيكي حياتي
يا أغلى عندي من حياتي
****************************
يوم لقاكي دا كان ميلادي
قبل منك كنت عادي
مش فارقة عندي أي حاجة
حبي كان قبلك سذاجة
روحي كانت عايزا حاجة
عايزا حب يبقى زادي
يحليّ ويجمّل سيرتي
يا أغلى عندي من حياتي
****************************
ولقيتك انتي يا حبيبتي
ودوبت دوب فيكي أنتي
لمّا تهلي ف طلعتك بهجة
قلبي يرفرف ويرجّني رجّة
ويضيع مني الكلام فجأة
وكأني طفل لسّه بيتهجّة
تضميني تضيع حيرتي
يا أغلى عندي من حياتي
*****************************
حروف الكلام جمعتها بحبّك
وغزلت منهم شعر متـْــحَبّك
ونديت بصوتي بعشقك وبحبك
لو كان بأيدي كنت أجمع لك
كل نجوم السما عناقيد
واخلي لك صوابعي تقيد
شموع يمكن تنور لك
لكن دا كله والله ما يّكفّي
ولا يسوى ولا يليق لك
يا شمسي وأيامي الجايه
بشروقك تحلى دنيايا
يا قمرة منورة ف سمايا
دا جمالك بيزوّد غيرتي
يا أغلى عندي من حياتي
**************************
يا أم الحنان والحب طارح
زي عشقي ما هو ليكي طارح
كل شيء فيكي بحبه وبعشقه
حروف اسمك ورسمك والملامح
يا أغلى عندي من حياتي
******************************
******************
******
إلى من ملكت كل مشاعري وحواسي
إلى روحي وعمري وكل ناسي
إلى حياتي وأغلى من حياتي
زوجتي العزيزة الغالية
أحمد عتريس
20 / 5 / 2011
