لحظة ميـــــــــــــلاد :
الحياة أولها صرخة
تملى كل الدنيا فرحة
واحنا صرختنا يا مصر
البداية لكل نصر
صرخة تشهد بالميلاد
صرخة الحق ف بلاد
من آلام الذل عانت
من سنين المر داقت
وامّا آن فيها الأوان
وابتدا وقت المخاض
الحق صرّخ واستبان
واتلملم الشمل وعاد
وابتدت لحظة ميلاد
************************
م اللحظة دي كله انتشى
فرحان بمولوده الجديد
فرحان بنفسه وما اختشى
يسعد ويرقص بالوليد
ما هو أصله مكبوت من سنين
جوا القلوب سكن الأنين
والكبت عشش ف القلوب
نخوّر وسوّس ف الدروب
وعشان أساسِك كان متين
والحلوة ناسِك مؤمنين
نصارى جنب مسلمين
مقدرش ع الشعب الجميل
مقدرش ع الشعب الأصيل
شعب انتفض قال كلمته
والسر كان في محبته
الكل قام كسر اللجام
وقفوا الولاد وقفة شداد
رافعين علم أم البلاد
من غير سلاح من غير عتاد
بينادوا إسقاط الفساد
والظلم يرحل م البلاد
والخير يرفرف بجناحاته
الكل فاق قام من سكاته
قام يجيب حق الولاد
وابتدت لحظة ميلاد
***********************
التاريخ مش راح يسامح
أي ظالم ندل جارح
أي أيد ليكي استباحت
أي ظالم رحته فاحت
كله مذكور ف الكتاب
دي الحقيقة مش سراب
ف الدنيا عشته تكون هِباب
والآخره لسّه في حساب
أصله خانِك وأنتي لِيه كنتي مأمنه
وهو سايق عبطه عامل فيها أزمة
والمبجل كان معظم كان يراضي
عمّال يدادي وكل همه بيع أراضي
وغيره نازل نهب فيكي وسرقه ياما
ظلمه عامي عينيه وقلبه والندامة
وكل حسرة ف دنيته و يوم القيامة
وكله واللهِ بميعاد
والفصل لــ رب العباد
اليوم دا للظالم هلاك
وللسعيد لحظة ميلاد
*************************
حبيبتي يلاّ نبتدي صفحة جديدة مخضره
ونعيش سوى ويّا الهوى عيشه جميلة معطره
من زمان الفرحة غايبة والدموع هيه اللي ليكي
راح نشيل الحزن عنك والدموع اللي ف عنيكي
ابتسمي يا أغلى حبيبة ونوري الدنيا بجمالك
صدقيني هتبقِي أحلى وربنا ليزيد جمالك
واهي رجعت البسمة لولادك
وابتدت لحظة ميلادك
*********************
أحمد عتريس
29/4/2011
ليست هناك تعليقات:
إرسال تعليق