نفسي أزور الحرم ...
ببدأ كلامي ببسم الله
وبحمد ربنا الرّزاق
وبصلي وسلم على نبينا
محمد معلم الأخلاق
بدعيك يا سامع دُعايا
السر قبل العلن
نفسي بجد أزور
واتمرمغ ف ساحة الحرم
أنا اصلي كلي ذنوب
وزيارة للمحبوب
تغسل ذنوبي وأتوب
وارجع وأنا مشتاق
*****************************
من صغري أشوف الكعبة جسمي كدا يقشعر
ولاقي نفسي تروح من شوقها وما بشعر
وألاقي نفسي بطوف بالكعبة ويّا الناس
وارفع ايديا ولبّي وقلبي كله حماس
والحَجْر الاسود أشوفه
وحِجْر إسماعيل أطوفه
واصلي ركعتين
ف مقام سيدنا إبراهيم
بالملتزم أتعلق
وأدعيك بكل إيمان
تغفر لي كل ذنوبي
يا رب يا رحمن
ودموعي تنزل بحور
م أنا حاسس بتقصيري
يا ذا الجلال والنور
اغفر لي أنا وغيري
دا أنا كل لحظة تفوت
من غير طاعة لله
بحس فيها بموت
وعليها بتحسّر
أنا أصلي كلي ذنوب
وزيارة للمحبوب
تغسل ذنوبي وأتوب
وارجع وأنا مشتاق
**************
واطلع وناوي السعي
بين الصفا والمروة
واشرب من ماء زمزم
وارتوي من نبعه رويّ
معقولة دا كله يحصل
دا أنا شكلي بحلم حلم
والله أنا شفتها
والرؤية دي تبقى حق
من شوقي لحسنها
بادعي ونادي الحق
تتحقق رؤيتي واقف على عرفات
مكسوف أنا منك ندمان على اللي فات
وحواسي من الخشوع طمعانا ف الغفران
وعينية بالدموع تبكي من العصيان
واكمني أنا عبدك بدعي وكلي يقين
إن أنت من حلمك راضي عن الملايين
وهيجي غفرانك لكل عبد أمين
حافظ على عهدك باقي ليوم الدين
وجيه يزور أرضك وماله كله حلال
طمعان ف غفرانك اغفر يا ذا الجلال
وارجم شيطان رجيم
وادعي رحمن رحيم
يزيد ف إيماني
وعليه يقويني
أنا أصلي كلي ذنوب
وزيارة للمحبوب
تغسل ذنوبي وأتوب
وارجع وأنا مشتاق
************************
وانزل وناوي أطوف
بالبيت سبع أشواط
واشبع من الرحمات
ومليّ عيني واشوف
الكعبة قبل وداع
واصلي ركعتين
خلف مقام إبراهيم
ودموعي من الوداع
عمّاله تتأوّه
وادعي تصبّرني
ما هو منك القوّة
أنا أصلي كلي ذنوب
وزيارة للمحبوب
تغسل ذنوبي وأتوب
وارجع وأنا مشتاق
************************
ورسولنا صلى الله على بن عبد الله
لازم نزور مسجده محمد نبي الله
صلى عليك الله يا خير خلق الله
شوفتك أنا ف نومي
ولقيت 3 تمرات
ودريت وشك دا عني
حسيت 3 حسرات
كان نفسي أشوف وشك
واشبع من النظرات
لكن عشان ذنبي
حرمت م الخيرات
وعشان كدا برجوك
يا سامع الدعوات
توعدني بزيارته
في حياتي قبل ممات
واتملىّ من نوره
واشبع من الخيرات
وأمد له أيدي
من طاقة من الطاقات
وألمسه بأيدي
يا أجمل السلامات
وارجع بقلب نضيف
زي الطفل الوليد
طاهر وما فوهش زيف
وارجع إنسان جديد
بادعيك يا ربي دايماً
بصالح الدعوات
وارزقني التوبة دايماً
ثبتني ع الخيرات
دا نفسي ازور الحرم
واتملىّ ف عظمته
مين ف الجمال قده
دا أنا لو هاموت من الألم
أمشي وروح حده
وأعيش ولو لحظة
وأموت وأنا ف حضنه
أنا أصلي كلي ذنوب
وزيارة للمحبوب
تغسل ذنوبي وأتوب
وارجع وأنا مشتاق
***********************
أحمد عتريس
3/5/2011
ليست هناك تعليقات:
إرسال تعليق