سيجال - مصر بخير - أحمد عتريس مروان محسن

مروان محسن :
مصر بخير

و لو محتاج اى دليل
شوف الفرحة فى طير الطير
حس النسمة فى حضن النيل
ولا الضحكة فى عين الغير
او فلاح من جوة اصيل
يزرع شجرة بتطرح خير
و جناين ورد و بساتين
حوليها اطفال امامير

مصر امان

مصر مش محتاجة حراس
مصر حميها رب الادان
مصر فى عينى و فوق الراس
مصر دى امى و ابويا كمان
مصر يا احلى و اجدع ناس
مصر فى قلبى فى كل مكان
مصر يا ام الدنيا و اساس
العالم فى بدايته زمان

مصر بخير
****************
أحمد عتريس :
مصر بخير ............

طول ما ولادك بيحبوكي
حب حقيقي مش تزييف
طول م إله الكون مراعيكي
يبقى ازاي هتهابي الخوف
طول ما بنحلم فيكي نعلّي
والاحلام جوانا تملّي
يبقى ازاي مننا هتمِلي
واحنا ولادك رافعين راسك
بإدينا حلمنا يتحقق
والحرية شمسها تشرق
وقبل إدينا إله الكون
ويانا واهو منه العون
ذكرك ف القرآن بالخير
أصل بلدنا مصر بخير
****************
مروان محسن :
زى ما رب الكون بيقول
عمرنا ما هنتفرق يوم
مهما الوقت يطول و يطول
هنفضل و الخير هيدوم

طول ما نهار الصبح الجاى
بيصبح بالخير و الضى
و يفتح فى الورد الحى
يبقى قلقنا مالهش لزوم

هنقلق من ايه و بلادنا
حاميها ربنا و ولادنا
بيكفحوا و بيحموا حياتنا
ولا هاممهم جوع ولا نوم

و طول ما على بلادنا بنغير
عاوزنها احسن مالغير
يبقى ليه نخاف مالتغيير
خوفنا ده كله ملوش تفسير

و طول ما بنسعى فى الخير
ولا لنا رغبة فتقدير
هنعلى و نعلى و نطير
و هتفضل حبيبيتنا بخير
*****************
أحمد عتريس :
طول م الطالب عارف دوره
والعامل بيراعي ضميره
والفلاح ناكل من زرعه
ولبن أبيض صافي بخيره
ويزرع قمحه تطلع شجرة
ناخد البذرة نقوم نطحنها
تبقى دقيق فعجين للخبزا
نعمل عيش مليان بالخير
يكفي بلدنا مصر الخير

طول م الأم تراعي ولادها
والدكتور بيداوي المرضى
مش بإديه يإدين المولى
وكله بيعمل عمل الخير
أصل الناس جواها الخير
وبلدنا والله بخير

طول م ايدينا في ايدين بعض
ونبقى انا وانتي نكمل بعض
طول م الحب أساس ف حياتنا
وضميرنا بيحرّك ذاتنا
وبالإيمان تحلو حياتنا
ومش نحتاج والله لحد
غير للمولى عز وجل
هو لوحده معز مذل
هو العاطي هو المانع
يكفي نرفع ايدنا وسامع
ندعي يملي بلدنا بخير
ربنا أصله مانح الخير
ومصر بلدنا والله بخير
*****************
تم بحمد الله في أبريل 2011

سيجال - حوار بين الرئيس المخلوع والشعب - أحمد عتريس وداليا سعيد

داليا سعيد :
سامع كلام خطير
فـ الشارع عدد كبير
يا ترى نازلين ليه ؟
واشمعنى راحو التحرير

راح بصرنى حبيبى حبيب
قال لى نزل الطبيب
مع خباز فلاح ومدرس
ومحدش ناوى يسيب

التحرير غير لما
يزيحو الغم والغمة
شفت ازاى خانونا يا ريس
وبيشككو كمان فـ الذمة

رديت والله لرجعهم بيتهم
والخيبة متشالة على راسهم
وهقتتل اللى معاندنى
ولا نسيوا انى ريسهم
****************
أحمد عتريس :
الأحلام دي هتبقى حقيقه
وهاتتحقق كل دقيقة
فقت وقمت خلاص من نومي
عسكر رصاص ولا بيهموني
هاهتف وأفضل أنادي وأقول
عايز حقي ف الحرية
واستمتع بديمقراطية
وعدالة إجتماعية
استحملت كتير من يومي

ف كل شارع وف كل ميدان
الناس هتعسكر بالأيام
هيصلوا ويدعوا الرحمن
يا رب إسقاط النظام

ثورتنا شريفة وسلمية
بكلام معسول قاله عشيه
طلعوا علينا البلطجية
بالملوتوف وخيول وجِمال
ومسيرة ضد الثوّار
بتسبح لك يا أبو جَمال
وبطوبة سلاح للثوار
وبقدرة قادر يا معين
الطوبة بقت مدفعيّة

مهما عملتوا فينا خلاص
مش هنسلم راسنا لناس
كل كلامهم غدر وخسه
مات فيهم كل الإحساس
وكفايه إنكوا حرامية

اللي مات مننا هايعيش
نحتسبة شهيد للحرية
واللي اتصاب مننا هايعيش
بكرامة ومرفوع الراس

ف الميدان قاعدين وبصحة
مش هنقوم قبل ما يتنحى
والغمة ربنا هيزيحها ....
وتتحقق كل الحرية
******************
داليا سعيد :
يا ولاد الايه يا مصريين
غلبتونى وانا فـ التمانين
ازارى الصوت المكتوم على
وجبتو القوة ده امتى وفين ؟

هتنحى خلاص وهسيبهالكو
بس مش هتتهنوا وهشغل بالكو
هولعها حرايق واملاها بلطجية
يسرقوا يخطفوا فـ عيالكو

من بعدى مفيش راحة ولا نوم
هشيلكو حمل جبال هموم
ههد كنايس واحرق مساجد
والمسيحى ع المسلم هيجيب اللوم

ومش هتلاقو عليا أدلة
ولا هقع يوم فـ مذلة
هنسف هفرم مش هخلى
ورق فـ أمن الدولة

هوقع بينكو وبين الجيش
والثقة الحب خلاص مفيش
هفكر كل واحد بعهدى
وازاى فـ امان كان بيعيش

هقول خطاب من قناة العربية
هفكركو دايما بالضربة الجوية
وبستحلف للى اساء غدر بيه
ده أنا مبارك رئيس الجمهورية
******************
أحمد عتريس:
قول يا حبيبي مهما تقول
كل كلامك بلا مفعول
كان يوم عيد يوم ما تنحيت
والأفراح دخلت ف البيت
والزعلان قدامه الحيط
يخبط فيه ويروح مقتول

هنفرح بس شويه وبكره
هنفتح صفحة جديدة لبكره
وكل كلامك مش للذكرى
أصله كلام ماسخ وعقيم
متاخد من نسخ قديم
وبيتكرر كل شويه
أصله كلام من شخص لئيم

هنشوف بكره مين اللي هايكسب
صاحب الحق وإلا اللي بيكدب
بكره نشوفك كدا مجنون
بعد ما قام 80 مليون
كل منانا إحنا الشعب
نشوفك كدا يا حبيبي مسجون

تعمل فيها مريض عيّان
برضه هتلبس بدله جنان
حمرا .. زرقا .. بكره يبان
ويقف على بابك سجّان
ويقدملك طبق العدس
تاكل منه من غير نِفس
وتعرف طعم الشقا والبؤس
انت وكل الحاشية بتاعتك
دول سباقوك ومناهم ودك
برضوا حبايبك مهماً كان
صحبة ولمّة وشلة جنان
وما ينفعش يسبوك وحدك

دي بداية 15 يوم
مش هيجيلك لحظة نوم
ياللي عشتنا ف عهدك زفت
كل كلامك منه أرفت
بادعي يارب انصرنا يارب
ع الظالم وولاد الك؟؟؟؟؟
يارب يارب يارب يارب ....
******************
داليا سعيد :
اوعوا تفكروا إنكو
ثوار مفيش زيكوا
يمكن شوية تعبان
لكن يومين وافوق لكو

طول عمرى عايش فرعون
زى ولادى ومراتى المصون
عاوزين تنهوا حياتنا ؟
هأ مستحيل ده يكون

بعد أما سجنت أكون مسجون؟
و فـ طرة قبرى اكون مدفون؟
أنا عشت رئيس وهموت رئيس
أيوا ل التمانين مليون

وفـ الأخبار فـ التليفزيون
خبر كان بطعم البونبون
مبارك مش مأثر فيه مهدئات
اتحول اتشل وصابه الجنون
*********************
تم بحمد الله في أبريل 2011

حلم ...

حلـــم!!!

الحلم زي الطيور

لازم يلف يدور

ولو في يوم انحبس

تلاقيه يموت مأهور

********************

وأنا حلمي حلم بسيط

سهل ما فهوش تعقيد

بحلم بـحُريّة

بحلم يكون لي بيت

واتهنى واعيش سعيد

مشتاق لحنيّة

بحلم أعيش ف النور

**********************

تعبت من كتر القساوة

بس عايش بالأمل

الظلم لازم له نهاية

مش يجوز ولا محتمل

بحلم أهد السور

***********************

بحلم أرفرف بجناحاتي ف الهوا

زي طير فرحان وطاير ف السما

بحلم وحلمي عنيد

دا بكره جاي أكيد

ولو للظلم إيد

العدل سيف بيدور

***********************

الحلم زي الطيور

لازم يلف يدور

ولو في يوم انحبس

تلاقيه يموت مأهور

 

*************************

*********

***

كلمات / أحمد عتريــــس

الثلاثاء الموافق / 18 / 1/2011 الساعة 2 ظهراً

بحبك بالطول والعرض ...

بحبك بالطول والعرض ...

وبحبك بالطول والعرض

ومشاعري تفوق الحد

حبك عندي دا أغلى هدية

من رب السما والأرض

وبحبك بالطول والعرض

**********************

مشاعري تنسج خيوط

زي شعاع الشمس منتشرة

من حبي يطرح شجر التوت

وأوراقه تحمينا بعروشها

ومهما تعدي سنين وتفوت

الحب باقي والعشرة

يا كل النبض

وبحبك بالطول والعرض

************************

مع ضحكتك بتنور الدنيا ف عينيّه

يا أغلى عندي من حياتي ومن عينيّه

وازاي في يوم حبك يهون

وانتي الحياة

دا مهما كان ومهما يكون

 عِشقِك نجاة

وازاي تضيعي من إيديّه

و أنتي الأمل والوعد

وبحبك بالطول والعرض

**************************

حبك معشش جوا مني

من بدايتي وصغر سني

وكبرت وأنا عِشقِك فتني

أصل أنا عَاشقِك بجد

وبحبك بالطول والعرض

*****************************

**************

****

كلمات / أحمد عتريس

الاثنين الموافق 17/1/2011 الساعة 5 مساءاً

الهويس ...

الهـــويـــــس....

 

يا هويس الشعر العربي

 دندن وقول موال

دا الشعر من خشمك

 يجري كما السلسال

صوتك دهب شِعرك دهب

تتحاكى بيه أجيال

**********************

ماكنتش هناك لما الرجال عبروا

على ذكر آل النبي

 مع ركعتين الفجر

وذكر الله أكبر

كانت شهادة ونصر

وكرامه للأجيال

**************************

ودا منطقي إنك تقول انسحبوا

دي أباتشي

ما ينسحبوشي

أصل الولاد رجالة

 ما يتهتوشي

 وفي مدح مصر

دول قوّالة ودا مش كفاية

 دا كفاية إنهم عند المحن رجالة

مش عيال

****************************

كل الحكاية إنهم بيحبوا ناديه

ومسميينك برضه نانا

وكان زمان اسمك إيزيس

مش مهم الاسم عندك مش كده

طيب خلاص ما تزعليش

يا أم الدلال

*************************

ف 24 شارع الحجاز

هتلاقي قطر الغلبانين

ملفوف بنعناع الجنينة

ومستني تلت خرفان

والبغبغان في قفصه

قال حظِك كده

تعشقي راجل صعيدي

ويعشقك ويغير يا بوبة

غيرة الرجال

************************

أيوه بغير وبحس بغيره

لما بلاقي الكل اتلموا

حواليكي وعنيكي يغموا

بحس ساعتها بكل إهانة

لمّا الاقيكي كده سكرانة

ومش دريانة

وأقول آآآآآه يانا

مش هتلاقي غيري معاكي

ومادد إيدي  بالتأشيرة

ومش هيكون غيرك

 في الجدول

************************

زعلت طبعاً يا جحا

مش عايز تشوف إختلاف

عارفك خسيس مستني لحظة للفراق

لكن بعينك مش هيبقى في يوم خناق

أصلها تبقى حبيبتي هيه اللي خطفتني

 بحسنها ... وبقولها

يا وخداني من الشيبة

يا معلماني الحب والتباريح

مش تبقى عيبة

أبعد وسيبها للتجريح

ساعتها أبقى يا ناس خيال

***************************

ليالي الحصاد فيكي بألف ليله وليله

دا الحياة في البعد عنك صدقيني مستحيلة

مش هابطل اقول الشعر فيكي

دا من غيرك ما يحلوّش

أصل أنا عَشقك وعِشقك ف قلبي

عاشق معشق ما يتحلّش

ومش راح تكون آخر قصيدة أكتبهالك

ولو كنتي يوم عني بعيدة بقولهالك

مش هجاء ولا رياء

دا عشان بحبك باشتياق

مش سري لكن ف العلن

وبقولها مش عايز تمن

أنا هشام لقبي الهويس

 دا مش نفاق ولا تهييس

بحبك يا أم العيال

**************************

بحلم أكون للشعرا أمير

بحلم أكون أنا الخيّال

مش بالمسابقة أنت الأمير

وشِعرك باقي للأجيال

******************

**********

****

*

إهداء إلى الشاعر العبقري / هشام الجخ .... أمير الشعراء الجديد

مع كل الإحترام والتقدير لأمير الشعراء الكبير / أحمد شوقي بك

كلمات/ أحمد عتريس

الأربعاء 26 / 1 / 2011

الساعة 4 عصراً

كلنا أقباط ...

كلنا أقباط ...

في البدء انعي بالأسى والحزن الأخوة المسيحيين للحادث الأليم الذي استهدف الآمنين العزل وهم في مكان للعبادة والصلاة ، بكنيسة القديسين بالإسكندرية ، احتفالا برأس السنة الميلادية وانعي كل المصريين " مسلمين ومسيحيين " المستهدفين ؛ لحدوث الفرقة والفتنة بينهم ، وكلنا وكل المصريين بريئين من مثل هذه الاعتداءات التي تستنكرها الأديان الوضعية ، فما بالنا بالدين السماوي والذي هو من عند الله سبحانه وتعالى ...

واسمحوا لي أن أبدأ مقالي بهذه الرباعية الرائعة للحاضر الغائب المبدع " صلاح جاهين " ، تعبر عن أصل البشر ، وتنوع صفاتهم بغض النظر عن الدين والثقافة والمعرفة ، فالأصل واحد ، لكل البشر :

مع إن كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين
عجبى !!!

ومهما كان ومهما يحدث فنحن أخوة لا يفرق شملنا " إرهاب " ، فعند الشدائد يظهر المعنى الحقيقي للرجولة والنخوة والأخوة المصرية ، فتاريخنا حافل بالبطولات التي يفخر بها كل مصري لأشخاص عظماء " مسلمين ومسيحيين " والكل يعرف ذلك عن ظهر قلب ، وحرب أكتوبر 1973 أقرب وخير شاهد على ذلك ، وتراب هذه الأرض الطيبة ، والذي ارتوى من دم الشهداء المصريين ، وأركز على كلمة المصريين " مسيحيين ومسلمين " ، فالكل كان يدافع عن أرضه وعرضه بكل قوة وبسالة وشرف ، فكلنا في مصر أقباطا ... من قديم الأزل وحتى يوم القيامة .

·   فبعيدا عن الدين وعن السياسة وعن كل ما يعكر صفو الحياة في مصر من مشاكل وهموم وأزمات وخلافة ... أود أن أوضح المعنى الحقيقي لكلمة " أقباط " ، والتي تتداول باستمرار في كل المحافل وعلى كل الألسن ، وفي رأيي المتواضع فهى تحدث خلافاً وفجوة بيننا نحن المصريين " مسلمين ومسيحيين " ، فاسمحوا لي أن أوضح المعنى الحقيقي لهذه الكلمة .

·       أصل الكلمة:

 أقباط :  جمع قبطي، وهو اسم يدل على ساكني وادي النيل المصريين وهي تعني سكان مصر القدماء ، وعند دخول العرب لمصر أطلقوا علي المصريين لفظ الأقباط نسبة إلي الكلمة العربية " قبط " وترجع " لقبط بن مصرايم بن حام بن سيدنا نوح " ، فقبط هو أول من سكن مصر وينطق بالعربية قبط ، أما بالعبرية فتنطق قفطايم ، وكان العرب يسمون مصر في القديم بلاد القبط ، فأصبحت كلمة قبط أشارة إلي المصريين منذ عهد الفراعنة إلى اليوم ، فتأتي كلمة قبطي لتعبر عن المصريين القدماء.

عرفت مصر في الشعوب السامية المجاورة لها باسم  " مصر " في الآشورية والعربية ، " ومصريين " في الآرامية ، و " مصرايم " في العبرية ، وفينيس في اللاتينية  " وايجبتوس " في اليونانية ، و كيمي أي السواد بمعنى الأرض السوداء في المصرية.

قبل دخول العرب إلى مصر كانت كلمة " قبط " تدل على أهل مصر دون أن يكون للمعتقد الديني أثر على ذلك الاستخدام، إلا أنه بسبب كون المسيحية كانت الديانة السائدة بين المصريين الأصليين وقت دخول العرب المسلمين مصر فقد اكتسب الاسم كذلك بعدا دينيا تمييزا لهم عن العرب المسلمين، إذ كان المصريين القدامى وحدهم هم المسيحيين، حتى انحصرت كلمه قبطي علي مر العصور لتشير للمسيحيين في الأحاديث وكذلك في الخطاب الرسمي للدولة. الأقباط الآن هم أكبر أقليه مسيحية في الشرق الأوسط، ويتركز معظمهم في جمهوريه مصر العربية إلي جانب السودان وليبيا ودولة إثيوبيا فضلا عن الدول الغربية .                                                   ( المصدر ويكيبيديا الموسوعة الحرة )

·   وعلى هذا أدعوا كل من يتكلم عنا نحن المصريين أن يتكلم ويقول كلنا أقباط ، وليس الأخوة المسيحيين وحدهم أقباطا ، لأننا جميعا أخوة فالأخوة ليست فقط أخوة النسب أو أخوة الدين ، ولكن هناك الأخوة الوطنية أخوة الإنسانية  فنحن من أصل واحد ، نعيش على أرض واحدة ، ونستنشق نفس الهواء ، ونأكل نفس الطعام ، وتجري في عروقنا نفس الدماء ، ونشرب من نيل واحد ، وكل هذا لا يفرق بين مسلم وغيره ، بين مسيحي وغيره ، فكلنا واحد وإن اختلف المعتقد ، وإن حدث مكروه لهذا الوطن فكلنا عندئذ سواء وإن أصاب هذا الوطن شر فعلى الجميع ، ولن يفرق بين مسلم ومسيحي ، اللهم أحفظ هذا الوطن وأهله من كل مكروه وسوء . فهذه دعوة إلى التعاون والتآخي ونبذ كل المعتقدات والأفكار الهدامة المتشددة ، وتعالوا نعبد الله كلًُُ كما يريد ولا يعيب أحد على أحد ولا يكفر أحدنا الآخر كما يفعل البعض ، فجميعنا إلى زوال وحسابنا على الله ، يوم القيامة يفصل بيننا سبحانه وتعالى .

فشعارنا " الدين لله والوطن لنا نحن المصريين الأقباط " .

بقلم : أحمد عتريس

                                                                                                           الثلاثاء 4/1/2011

عايز حقي ...

عايز حقي ...

يا لطيف ألطف بينا

وارحمنا من كل خسيس

وفقنا وثبت خطاوينا

وانصرنا على كل دسيس

عايز حقي يا ربي وبادعي

ع الظالم أبو قلب خبيث

***********************

قلنا نخلي بلدنا عمار

ردوا وقالوا اسكت يا حمار

ليه تتكلم اسكت ساكت

جزمة في بوقك خليك حاطت

أصلها فرصة أصلها ظاتت

الحق واهبش كام مليار

***********************

عايز حقي من الناس دية

دول كانوا شوية حرامية

ضحكوا علينا بكدبة كبيرة

كل كلامهم كان تخديرة

والنية في الأصل ضريرة

نهبونا وخدوا كل الميه

**********************

عايز حقي ومش هتنازل

كانوا واكلينوا طالع نازل

مش هنسلم مش هنبيع

حق بلدنا مش هيضيع

أي خسيس أو أي وضيع

راح يتحاسب راح يتنازل

************************

عايز حقي وحق ولادي

كنت بهاتي وكنت بنادي

وما فيش حد عايز يسمع

واللي ف نفسه يقوم ويولع

أصله خلاص م الذل اتكرع

والحرامية كتييير ف بلادي

بس خلاص من بعد اليوم

مش هيلاقوا مكان في بلادي

***********************

عايز حقي عايز حقي

بالتنتوفة ومش راح أبقي

كانت عندي علّه ف قلبي

بس خلاص مش آقدر أخبي

كله هيطلع كله يلبّي

وراح تحلوي يا بلدي وتبقي

************************

استحملتي يا بلدي كتير

واستحملنا معاكي سنين

سرقوكي ونهبوكي كتير

وباعونا أحنا الاتنين

كانوا بيحفّوا ويملوا كروشهم

كانت ميغة ومين هيحوشهم

فوقنا وقلنا لاء في وشوشهم

وبدأنا خلاص التغيير

**********

***

كلمات / أحمد عتريس

الجمعة الموافق 18 فبراير 2011

الساعة 4:30 عصراً

حلم وألا علم ...

حلم وألا علم ...

والله وعشت وشفت اليوم

اللي أروح فيه استفتاء

صاحي م النجمة كدا م النوم

اصلي حقيقي لكدا مشتاق

*******************

دا حلم وألا علم يا ناس

دا الواحد حاسس إحساس

بصراحة مش قادر أقوله

من الفرحة بقى كلي حماس

*******************

معقولة نزلت وقولت أنا مصري

استفتيت وطالبت بحقي

بعد سنين من الكبت الحصري

قولت يا ناس أنا عايز حقي

 *******************

على إيه هنلف وهندور

دي بداية لتغيير دستور

دا كفاية الواحد بيعبر

وصباعه بقى فيه فسفور

  ********************

************

******

***

أحمد عتريس

السبت 19/3/2011

رمز الجمال ...

رمز الجمال

مات واندفن رمز الجمال

جوانا في مليون سؤال

كان ذنبه ايه تعذبوه

كان ذنبه ايه تموتوه

كان ناقص ايه؟ تصلبوه !

شوّهتوا ليه رمز الجمال

دا حرام دا وإلا يا ناس حلال

خليتوا جوّانا اعتلال

وكفاية في نظامنا اختلال

دا بلدنا مش ناقصة احتلال

وكفاية مات رمز الجمال

*****************************

خالد سعيد موضوعه عنا مش بعيد

وعزاءنا إنه مات شهيد

ف إسكندرية وقعة غبية ف ليلة العيد

اغتالوا ناس ما لهمش ذنب

ليهم محبة ف كل قلب

كل الحكاية إنهم كانوا فرحانين بالعيد

وفي ناس كتير زيهم

راحوا ضحيه لغدر

وكفاية واحد منهم

من اسمه يجي البدر

ديانته مصري إسكندراني

قالوا سلفي ... قالوا إخواني

مايهمنيش هو ايه

ما يهمنيش دينه ايه

كفاية عندي إنه مصري

مصري بيرمز للجمال

************************

دا كلامي على الإنسان

وسلامي على الأديان

ولو مش عارف ايه اسمه

ولو ما اعرفتش ايه ف جسمه

هتلاقي صورته ف الصحف

وجريمته إنه بيعترف

ما اعرفش منهم أي حد

والله أنا ما ليّه يد

ولا في مجرد إحتمال

واسمي معروف من زمان

السيد سيد جلال

*******************************

دا في أي شرع وأي دين

والله دا أنا قلبي حزين

مش دي بلدنا وأرضنا ؟؟؟

هو انتي مصر!!! وإلا انتي مين ؟؟؟

مستنيين الرد منك

مستنظرينة من سنين

ومعاكي عايشين بالآمال

يا مصر يا رمز الجمال

********************************

****************

*********

***

كلمات / أحمد عتريس

السبت 8/1/2011 

الساعة 2 ظهراً