قطر الصعيد ...
بالطبل والزمامير قادم قطر الصعيد
وبصوته بيصَفْر وينادي من بعيد
ماشي ومتحمل من المنيا
بالناس اهو مكمل ودي الدنيا
السكة صحيح طويلة
ماشي ما بيده حيلة
عمّال بصوته يتووووت
على كل كفر يفووووت
وهُبّاَ في سمالووووط
وقعت الكارثة
قالوا إنها حادثة
والضرب عشوائي
يا أخونا دا فدائي
بيقوله م الشرطة
وفريسته دي لقطة
مستني ومخطط
من غير ما يتنطط
القطر قام راكن
ف محطّته ساكن
والدنيا كانت واسعة
وف عَرَبة كانت تسعة
حصلت الكارثة
قالوا إنها حادثة
والضرب عشوائي
يا أخونا دا فدائي
مات مننا واحد
وربنا واحد
واتصابنا بالخمسة
ما كفاية بقى خسة
والرحمة من عندك
انت البطش الشديد
برصاصة وبإرهاب راجع قطر الصعيد
وبصوته بينوّح يبكي دم الشهيد
الغنوة اتغيرت واتبدلت معانيها
مشاعرنا اتحجرت من كتر مآسيها
ارحمنا برحمتك
من كل غدرة أيد
كلمات/ أحمد عتريس
الأربعاء الموافق:12/1/2011
الساعة 7 مساءاً
ليست هناك تعليقات:
إرسال تعليق