الوشوش ...
الدنيا صورة كبيرة متبروزا ف برواز
والناس جواها تايهه ومحبوسة ف لوح إزاز
على كل شكل ولون مليانة بالوشوش
وشوش زي الملايكة
مليانة بالبراءة
ووشوش فالصوا وسَكْة
غرقانة في الدناءة
ووشوش في كل سِكْة
تبعد وتتلاقى
والكل فيكي يا دنيا عامل كما الهزاز
*******************************
أقصى اليمين م الصورة
شايف نظرة حزينة
والوش عليه ابتسامة
مرسومة بس زينة
ونظرة ف وش قاعد
والضحكة فيه رزينة
ونظرة هناك لئيمة
صاحبها قيمة وسيما
قالوا عليه أستاذ
*****************************
في الركن هناك شمال
وشوش زي الرمال
تغريك وف ثانية واحدة
تلاقيها وشوش خيال
ووشوش حايرة وبايرة
على كل شكل دايرة
بتلف في وسط دايرة
وسط اللوح الإزاز
**************************
ووشوش تلاقيها حالمة
سرحانة في دنيا هايمة
مش فارقه معاها حاجة
نعسانة تقولش نايمة
ووشوش مغرورة جدا
البعد عنها أحسن
نظرتها عالية دايماً
مليانة استفزاز
*************************ووشوش فيها ابتسامة
مليانة بالسلامة
ضحكتها أكبر علامة
ع الخير وحب الناس
عمرانة بالإحساس
والحب والإخلاص
بتشدنا وتخطفنا
على طول ليها بننحاز
***********************
خد بالك م الوشوش
وعيش من غير رتوش
وخليّ النية صافية
هتلاقي الدنيا وافيه
وياريت نعيش حياتنا
بوش صافي بريء
هنلاقي 100 صديق
بينوّروا ف الطريق
ونحقق الإنجاز
***********************
***************
********
***
· الفكره مستوحاه من مدونة للصديقة العزيزة : أمنية نادي – بعنوان " صورة " - ...
شكراً أمنية
أحمد عتريس
الجمعة 1/4/2011
ليست هناك تعليقات:
إرسال تعليق