وعادت ليكي الحياة ...
وعادت ليكي الحياة يا مصر
بعد ثورة شباب النصر
كنتي تايها من سنين
كنتي غرقانة ف ضنين
قاموا ولادك الطيبين
رجعوا ليكي الحياة
********************
افرحي يا أم الولاد
دا الولاد دول عاشقانينك
مش نفاق ولا رياء
لكن دا حب وبشتياق
كل الحكاية إنهم
حاسوا بعذابك وبأنينك
والثورة كانت
طوق نجاة
*********************
سجل يا تاريخ في أوراقك
وافتح صفحة جديدة
واكتب بدم الولاد
بداية ميلاد
مصر الجديدة
المكان في ميدان التحرير
التاريخ 25 من يناير
والسنة 2011
الساعة 2 الظهر
كانت بداية خير
مش بداية شر
بداية التغيير
******************
والورد فتح في الجناين
والمشهد كان بديع
خلي العالم يعاين
ويشوف فصل الربيع
ألوان كتير والريحة عنبر
والكل جاي عايز يعبر
والكل بيردد ينادي
سلمية ثورتنا يا مصر
مشتاقين لك ترجعي لنا
ومشتاقين ترجّعينا
*******************
صرخة شباب مدويّة
تقولش طلقت بندقيّة
قالوا عيال أفنديّة
هيهيصوا ويجعجعوا
سيبهم شوية
الشعب كله ف لحظة قام
عمّال يردد بانتظام
يا رب إسقاط النظام
عايزين نعيش عيشة كريمة
*******************
كان حلم جوا مننا
ترجعي يا مصر لينا
وعشان نحقق حلمنا
لازم نضحي بدمنا
ونرجع الحق بأدينا
*********************
هيموت كتير مش مهم
هيعيشوا أكتر
وايه يعني يسيل الدم
بس نعبر
لازم نكسّر
أي حاجز خوف ملينا
*********************
وما تزعليش يا أم الشهيد
ابنك ما متش
ابنك هناك عايش سعيد
في الجنة عاش
ليه تنوحي دا أنتي لازم تفرحي
ابنك بحياته ضحى عشان نعيش
احنا متنا وهو عاش
*******************
دم الشهيد ع الأرض سال
والدم مش هيروح هدر
يروي ترابك كما السلسال
ويبقى جسر لمن عبر
والتاريخ لازم هيشهد والزمن
والحياة لازم هندفهعا التمن
دا الحرية مش ببلاش
*******************
اللي ماتوا عاشوا شهدا وسطتنا
ضحوا بحياتهم لجل يرجع حقنا
ومايتنسوش
أصلهم جوا القلوب متربعين
وف جنة الخلد هناك متنعمين
وماهيمتوش
كل ليل مهما طال لازم هيخلص
كل ظالم مهما كان ظلمه هينقص
مهما طال الانتظار
لازم هيطلع النهار
ونداوي ذل الإنكسار
وترجع الحياة لينا
****************
مش عايزين الحلم يموت
دي مش هوجه كدا وتفوت
دي أحلام 80 مليون
وشعارهم هنكون هنكون
ومش نتنازل مهما يكون
حتى ولو هنموت هنموت
احنا نموت وبلدنا تعيش
ونرّجع ليها الحياة
********************
يا من تعيش بلا كرامة
أرحل وتصحبك الندامة
أنا لا أطأطئ هامتي
لأي شخص مهما كان
لك يا بلادي محبتي
والمجد على طول الزمان
اسلموا يا شعب مصر
ولكم مني تحية
اسلمي يا ارض مصر
ولكي مني سلاما
*******************
***********
إلى كل من شارك في ثورة 25 يناير ومن لم يشارك ، إلى أرواح الشهداء ، إلى كل الشعب المصري ، إليكِ يا مصر ............. أهدي ................
أحمد عتريس
الجمعة 11 فبراير 2011
الساعة 6:30 مساءاً
يوم تنحي الرئيس/ محمد حسني مبارك عن الحكم في مصر ورحيله تلبية لرغبة الشعب المصري 
ليست هناك تعليقات:
إرسال تعليق